Latinoamerika; bidaia baten hainbat zertzelada, irudi eta esteka (04)
La Paz eta El Alto
(2018/10/07)
El Alto goi-ordokian dago. Bere ekialdeko mugan La Paz hiria hasten da, Choqueyapu ibaiak sortutako arroilan babestuta. Bi hiriek metropoli-barruti bat osatzen dute; 1985eraino hiri bakar bat izan da, La Paz, baina geroztik bi hiri eta udalerri dira. Biren arteko garraiorik azkarrena eta modernoena teleferiko sare bat da; 2014an hasi zen funtzionatzen linea gorria, lehenengoa; 2019an hamar linea izango ditu “aireko metro” honek, kolorez bereiztuta. La Paz hiriko Geltoki Zentrala 3.689 metrotan dago, El Alto-ko 16 de Julio-koak 4.095ean, beraz, oxigeno gutxiago.
Bi hiriren arteko ezberdintasun gehiago daude. El Alto hirian emigrazioa kontzentratzen da; La Paz hiriko hegoaldeko auzoetan aberatsak eta pribilegiatuak. El Altok 922.000 biztanle inguru ditu; La Pazek 793.000 gutxi gora behera. El Alton 14.394 familia erabat behartsu bizi dira; La Paz hirian 3.825, eta seguruenik ez hegoaldeko auzoetan.
Aireko metroak bi hiri, talde sozial batzuk eta hainbat auzo lotzen ditu.
iruzkinik ez:
Argitaratu iruzkina